Kreatiewe denkers by Boekgesprekreeks en hope plaaslike talent by die KKNK

165

Feesgangers by vanjaar se KKNK het ’n geleentheid om na kreatiewe denkers te luister en meer oor hulle prosesse te leer tydens die Boekgespreksreeks in die ATKV-Boeke-oase.

Dié propvol program is deur Daniel Hugo, bekende digter en vertaler, en NB Uitgewers se Eben Pienaar saamgestel. Boekgesprekke duur 60 minute en word daagliks gratis in die ATKV-Boeke-oase in die Netwerk24-Feeskafee aangebied. Gesprekke word moontlik gemaak deur die Het Jan Marais Nationale Fonds.

’n Wye reeks onderwerpe en kwessies word tydens dié gesprekke bespreek en aangeraak, met iets waarby elke leser aanklank sal vind.

Ondersoekende joernalis Jacques Pauw gesels met Ivor Price oor sy topverkoper The President’s Keepers, (3 April 15:30) oor die donkerste geheim in die hart van oudpres. Jacob Zuma se regering, terwyl Adriaan Basson en Price oor Joernaliste en die president gesels (1 April 10:30) oor onder meer of joernaliste ’n korrupte regering op sy pad van verwoesting kan stuit.

Chris Marnewick, Rudie van Rensburg en Irna van Zyl gesels in Misdaadskrywers (30 Maart 10:30) met Johannes de Villiers oor die opbloei van misdaadverhale wêreldwyd en in Suid-Afrika. Verder tot die misdaad-tema lei Price ’n gesprek met Julian Jansen oor Die De Zalze-moorde (30 Maart 12:00).

De Villiers, joernalis en joga-instrukteur, sê hy sien baie daarna uit om deel van ’n geleentheid te wees waar Afrikaanses hul verstand in ’n verskeidenheid rigtings kan rek en strek. “Die twee geleenthede waarby ek betrokke is, handel oor hoe om bewustelik (mindful) te leef (Kalmte in die malle gejaag, 30 Maart 14:00) en misdaadromans, so ver uitmekaar as wat twee onderwerpe kan wees. Dit is heerlik dat die KKNK vir albei ruimte het. Beide gesprekke gaan ’n ligte trant volg, sodat mense ’n pret kan hê terwyl hulle hopelik iets nuut leer,” sê hy.

Vertalings kom in die soeklig met Frank Westerman se besoek aan die KKNK uit Nederland, vir ’n gesprek met Hugo in El Negro en ek (31 Maart 10:30) oor sy boeiende boek, wat deur Hugo vertaal is. Kobus Geldenhuys en prof. Maritha Snyman tree in gesprek oor Jeugliteratuur in vertaling (29 Maart 10:30) oor die uitdagings wat die vertaling van jeugboeke bied.

Die program sluit drie kosdemonstrasies in, waaronder Boerekos met ’n twist deur Annelien Pienaar (30 Maart 15:30), waar die gehoor hul ma, ouma en oumagrootjie se huiskos herontmoet. Martelize Brink, bekende RSG-omroeper, nooi feesgangers na haar gesprek Martelize Kook! (1 April 15:30) met ’n versameling resepte wat sy na ’n lang werkdag geniet. Herman Lensing, SARIE se kosredakteur, deel op 2 April om 12:00 sy 30-minute-resepte, 30 dinge wat jy van wyn moet weet en ander kombuiswenke.

In Die lang man sonder skaduwee gesels Antoinette Pienaar (29 Maart 14:00) oor haar jongste boek se liriese beskrywings van die lewe in die Karoo en deel unieke inligting oor alternatiewe genesing.

Die dikwels omstrede Rian van Heerden gesels oor sy boek 16 dinge wat ek nie moes sê nie met Brink (31 Maart 15:30) terwyl Hykie Berg in gesprek tree met Johann van Lill oor sy boek My storie van hoop (1 April 12:00) oor sy jare lange stryd met dwelms.

Digkuns kom in die soeklig met Aantekeninge teen die skemeruur met Clinton V. du Plessis wat met Hugo gesels oor sy nuwe digbundel, waarmee hy dit vir die eerste keer waag om die kollig te betree (3 April 14:00). Hendrik Hofmeyr en Laurinda Hofmeyr tree in gesprek met Hugo oor die toonset van Afrikaanse verse in Waarom toonset ek ’n gedig? (2 April 10:30). Petrovna Metelerkamp los ’n hele paar raaisels op in haar eerste omvattende biografie van Ingrid Jonker tydens Ingrid Jonker die onsterflike (2 April 14:00).

Pieter Fourie neem deel aan drie gesprekke: In Drama en die gemeenskap gesels Fourie, Amee Lekas en Marthinus Basson oor die invloed van teater op ’n verskeurde samelewing (3 April 10:30); Fourie praat tydens Veteraan aan die woord met Hugo oor sy debuut as digter op 77-jarige ouderdom en sy opwindende bundel Bidsnoer, wat pas verskyn het (4 April 10:30) en sluit die Boekgesprekke-program af op 4 April om 14:00 saam met Jolyn Phillips, Clinton V. du Plessis en Hugo met Vaarwel en koebaai, waar hulle voorlesings uit hulle nuwe werke doen.

Lag saam met André le Roux oor die hemelsbreë verskille tussen mans en vroue in Waarom mans altyd reg is (en ander onnoselhede) op 31 Maart om 12:00. Le Roux deel ook meer oor Narsisiste, psigopate, stalkers en sadiste (1 April 14:00), sy deeglik nagevorsde en onderhoudende boek.

Ander gesprekke sluit in Dwarsklap: Skakerings van swart in die nuwe Suid-Afrika (31 Maart 14:00) met Piet Matipa en Ek & Jy – verhoudings wat werk met Lisa Swart en Louis Awerbuck (2 April 15:30).

’n Kenmerk van hierdie jaar se KKNK-feesprogram, is verskeie optredes deur kunstenaars van Oudtshoorn en elders uit die Eden Distrik.

Dié Klein Karoo-fees word van Donderdag, 29 Maart tot Woensdag, 4 April vir die 24ste keer op Oudtshoorn aangebied, in die nasionale skoolvakansie en oor Paasnaweek.

Denver Manual, oftewel Danny B, hip-hopkunstenaar van Oudtshoorn, vervaardig Rymklets van Oos tot Wes, wat op die Huisgenoot-verhoog as deel van die aandprogram in die Kuierbuurt aangebied word. Hy was ook verlede jaar die vervaardiger, wat aan hom die Kanna vir beste musiekproduksie én ’n Fiësta-nominasie as beste musiekgedrewe produksie – buitelug besorg het.

Danny B sê hy wou as kind by die fees wees, om sy gunsteling-akteurs en sterre te sien. “Later was ek self nuuskierig en wou ook doen wat die kunstenaars doen, omdat ek ’n liefde vir musiek en dans het,” vertel hy. Hy het sy eerste werksessie in 2010 as opkomende kunstenaar bygewoon en was opgewonde oor die geleentheid om sy vaardighede as kunstenaar te verskerp. “ ’n Werksessie oor bemarking en bestuur van kunstenaars, het my laat besef dat alles in die lewe tyd neem – veral as jy wil seker maak mense ontdek jou talent. En die KKNK is dié fees waar mense jou moet hoor én sien,” sê hy.

“Die geleenthede wat die KKNK aan opkomende kunstenaars bied is van groot waarde. Ek het geweldige waardering vir wat die KKNK vir plaaslike kunstenaars doen,” sluit hy af. Ander kunstenaars van Oudtshoorn wat by Rymklets betrokke is, sluit in Japsnoet, die dansgroep Oudtshoorn Collabo en Lincoln Philander (verhoogbestuurder).

Gail & Malcolm Arendse, sangpaar oorspronklik van Kaapstad, sê hulle sien daarna uit om by die fees op te tree, aangesien Gail se pa in Oudtshoorn gebore en getoë is. “Toe ons kinders was, het ons jaarliks die fees bygewoon en dit is ’n groot voorreg vir my en Malcolm om nou op dié platform op te tree. Mense moet sien hoe ongelooflik ons plaaslike talent is en watter wonderlike platform ons hiér, in ons tuisdorp het,” sê Gail. Gail vertel verder dat sy voel almal moet die KKNK bywoon, aangesien die fees die dorp se inwoners – oud en jonk – bymekaarbring. “En niks doen dít beter, as kuns en musiek nie.” Gail & Malcolm deel op 31 Maart 19:30 die verhoog met o.a. Adam Tas en Refentse in Karoo-nag op die Huisgenoot-verhoog.

Nóg ’n boorling van Oudtshoorn, Percy de Villiers, is in Karoo-nag te sien. Hy sê dit is vir hom ’n voorreg om by die KKNK op te tree. “My musiekloopbaan het ’n paar jaar gelede as gospelsanger by die KKNK begin, waarna daar vele hoogtepunte gevolg het – maar dié optrede op die Huisgenoot-verhoog is beslis die grootste een tot dusvêr. Dit is ’n eer om die verhoog met hierdie uitsonderlike kunstenaars te deel,” sê hy. De Villiers, wat ook op die Castle Lager-verhoog en RSG-verhoog optree, glo sy deelname by vanjaar se fees gaan ook ander jongmense motiveer om hulle drome na te streef.

Hoërskool Oudtshoorn se Ad Astra-koor, tree vir die vyfde agtereenvolgende jaar by die KKNK op. “Elke jaar is vir ons meer opwindend as die vorige een. Ons beskou dit as ’n groot voorreg om deel van die KKNK te wees,” sê Elmine Bester, koorleier en dirigent. Hulle deel op 1 April om 19:30 in Boontoe: Engelstemme die verhoog met onder andere Jo Black, Corlea Botha, Thembeka en Robbie Wessels.

Ander Oudtshoorniete wat op die Huisgenoot-verhoog optree sluit in: Bradley Zeelie (Karoo-nag) ’n danser van George en vorige wenner van die KKNK/Remgro-beurs en die Eurythmics Dance Academy (kykNET – Dans op die vlaktes, 30 Maart 19:30).

Die Kuierbuurt se Castle Lager-verhoog deel die talente van plaaslike kunstenaars soos Paul Amas, House of Entertainment, Rubber Johnny, Janine Fourie, die Donkiekar-orkes en ander kunstenaars wat deur ’n talentsoek-inisiatief geïdentifiseer word. Amas, wat die seremoniemeester van dié verhoog is, sê hy sien uit na sy deelname by vanjaar se KKNK.

Op die RSG-verhoog in Baron van Reedestraat deel Poem Mooney, André Boezak en Jeremy van Wyk staaltjies en stories as deel van ATKV-Kampvuur. Amas en House of Entertainment sorg ook op 31 Maart vanaf 20:00 vir die musiekvermaak hier, wat regstreeks op RSG uitgesaai word.

By die ATKV-Speelbos in die Kuierbuurt, bied leerders van George Senior Sekondêr soggens, onder leiding van Tanita da Silva, ’n program van kindervermaak met stories en musiek aan. Twee produksies deur plaaslike kunstenaars vorm deel van die derde Uitkampteater-aanbod: Potluck, ’n toonkas van plaaslike talent en Brandmerk, deur die wenners van die Eden Dramafees met Stephren Saayman, Jomelia Mekeur, Heinrich Hendricks en Robyn September kan daagliks hier gesien word.

’n Nuwe inisiatief waar plaaslike talent voor die KKNK ontwikkel word, onder leiding van Shihaam Domingo en ondersteun deur kykNET, skep verskeie optreegeleenthede op die Castle Lager-verhoog-verhoog by die Kuierbuurt.

Deel jou kommentaar | Share your comments here:

Persone se Kommentaar | Comments

Advertensie